2-Cİ QARABAĞ MÜHARİBƏSİ ŞƏHİDİ XÜSUSİ TƏYİNATLI MİÇMAN ELVİN SƏFƏROV - VİDEO

 

Azərbaycan Hərbi Dəniz Qüvvələrinin xüsusi təyinatlı miçmanı, dəniz pişiyi, İkinci Qarabağ müharibəsi şəhidi Elvin Səfərov 1989-cu il dekabrın 10-da Lerik rayonunun Soru kəndində anadan olub. 1996–2007-ci illərdə T. Cəfərov adına Soru kənd tam orta məktəbində təhsil alıb.

2008–2009-cu illərdə Daxili İşlər Nazirliyinin Daxili Qoşunlarının "N" saylı hərbi hissəsində xüsusi təyinatlıların sıralarında müddətli həqiqi hərbi xidmətdə olub. 2014-cü ildən isə müddətdən artıq həqiqi hərbi xidmət qulluqçusu idi. Qısa müddət ərzində Xüsusi təyinatlıların kurslarını yüksək qiymətlərlə bitirmişdir. "Aprel" döyüşlərinin iştirakçısı olmuşdur.

Türkiyədə, Belarusda, Qazaxıstanda, Yunanıstanda və s. ölkələrdə kurslar keçmiş, hərbi təlim və yarışlarda "SNAYPER" üzrə ölkəmizi təmsil etmiş, dəfələrlə yüksək nəticələr qazanmışdır.

İkinci Qarabağ müharibəsi zamanı ilk olaraq Tərtərin Talış kəndinin azadlığı uğrunda gedən döyüşlərə qatılmış, çox aktiv iştirak edərək düşmənin canlı və cansız hədəflərinin məhv edilməsində qəhrəmanlıq göstərmişdir. Verilən tapşırıq əsasında miçman Elvin Səfərov Hadrutun, Cəbrayılın, Füzulinin, Zəngilanın, Qubadlının və Xocavəndin azadlığı uğrunda gedən döyüşlərdə qəhrəmancasına savaşmışdır. Elvin Səfərov oktyabrın 31-də Xocavəndin Qızılqaya yüksəkliyi uğrunda gedən döyüşlər zamanı şəhidlik zirvəsinə ucalmışdır.

1 noyabr 2020-ci ildə Lerik rayonundun Soru kəndində dəfn edilmişdir. Elvin Səfərov 34 günlük qəhrəmanlıq salnaməsində düşmənin 300-ə yaxın canlı qüvvəsini məhv etmişdir. Miçman ölümündən sonra "Qarabağ" ordeni, "Cəbrayılın azad olunmasına görə" , "Xocavəndin azad olunmasına görə", "Füzulinin azad olunmasına görə", "Qubadlının azad olunmasına görə" medalları ilə təltif edilib.

Məkanı cənnət olsun!