Azərbaycanlı milyarderlərin bazarı yandı: Rusiya - VİDEO

 

Rusiyanın paytaxtı Moskvada azərbaycanəsilli iş adamlarına məxsus “Sadovod” bazarında yanğın baş verib.

Hadisə barədə Rusiya Fövqəladə Hallar Nazirliyi məlumat yayıb. Yanğının 2-ci çətinlik səviyyəsində olduğu qiymətləndirilib və dərhal təxliyə işləri başlanılıb. Yanğın nəticəsində iki nəfərin xəsarət aldığı və xəsarət alan şəxslərə tibbi yardım göstərildiyi də məlumatda qeyd olunub. Eyni zamanda bazardan 350 nəfərin təxliyə olunduğu bildirilib.

Bazarda baş verən yanğın ilkin olaraq 150 kv metr ərazini əhatə etsə də daha sonra genişlənərək 600 kv metr ərazini əhatə edib.

Bildirilib ki, “Sadovod” bazarında baş verən yanğının söndürülməsi üçün “Kobra” yanğınsöndürmə sistemindən istifadə edilib ki, bu da qapalı məkanda baş verən yanğını konteynerlərin içərisinə girmədən dəlik vasitəsilə söndürməyə imkan verir.

Yanğınsöndürmə əməliyyatına 170-dən çox yanğınsöndürən və 48 texnika cəlb olunub. FHN yanğın nəticəsində itkilər barədə məlumat daxil olmadığını da açıqlayıb.

Rusiya FHN-in verdiyi məlumata əsasən yanğının saat 17.00-da söndürüldüyü bildirilib.

Qeyd edək ki, Moskva Dairəvi Yolunun 14-cü kilometrliyində yerləşən “Sadovod” bazarı azərbaycanəsilli iş adamları Qod Nisanov və Zarah İliyevin “Kiyevskaya ploşşad” şirkətinə məxsusdur.